Në një rrëfim ekskluziv për gazetën britanke “The Guardian”, vajza e bosit meksikan të drogës, Joachim “El Chapo” Guzman deklaron se ai u arrestua pasi u tradhtua nga bashkëpunëtori i tij i ngushtë.
Rosa Isela Guzman Ortiz shprehet e tronditur për mënyrën sesi u gjet dhe më pas u arrestua i ati narkotrafikant.
“Im atë është tradhtuar nga Ismael El Mayo Zambada, që de fakto ishte shefi i kartelit kur babai ishte në burg. Jemi të bindur për këtë”, thotë Rosa Isela Guzman.
Vajza e kreut të kartelit famëkeq të Sinaloas rrëfen më tej se i ati dhe bashkëpunëtori i tij takoheshin gjithnjë në vende private. “Dhe atë ditë, babai u çudit shumë për atë takim të caktuar në atë vend”, vijon Rosa Isela.
Sipas saj, i ati është tradhtuar nga një fraksion rival i kartelit dhe nga politikanët, të cilët i kanë kërkuar marrëdhëniet me botën e krimit tek dikush tjetër.
