Tri janë pistat e hetimit të policisë në lidhje me atentatin me armë ndaj shoferit të parkut të Ministrisë së Brendshme, Vilion Cakollari. Grupi i hetimit i ngritur për ngjarjen, dje gjatë gjithë ditës ka kaluar në sitë bizneset private të zonës që mund të kenë pasur kamera sigurie me kënd shikimi drejt vendit të ngjarjes, shkruan Panorama. Asnjë e tillë nuk është gjetur në fund të ditës së djeshme, duke e bërë më të vështirë identifikimin e autorit.
Ndërkaq, dëshmitarët i kanë thënë policisë se një person i vetëm i veshur me rroba sportive të errëta ka qenë ai që ka shtënë me armë ndaj 37-vjeçarit. Autori besohet se ka shkrehur një karikator pistolete, pasi tre plumba kanë prekur edhe portën hyrëse të pallatit, ndërsa katër predha kanë dëmtuar trupin e Vilion Cakollarit, shkruan Panorama. Sipas dëshmitarëve, personi në fjalë ka qenë i maskuar me një kapele në kokë, strehën e së cilës e kishte ulur fort mbi fytyrë. Pasi ka qëlluar ndaj punonjësit të Ministrisë së Brendshme autori i krimit ka ikur në këmbë duke u zhdukur mes pallateve
PISTAT E HETIMIT
Hakmarrja për konfliktet e vëllait të Vilion Cakollarit në Londër, para ekstradimit në Shqipëri, është një nga pistat që po heton policia. Po kështu, në hetim është edhe një vrasje e kryer nga ana e Laurent Cakollarit, vëllait të Vilionit, në vitin 1998 në Tiranë.
Pista e tretë ka të bëjë me faktin se Cakollari është kunati i shtetasit Petrit Lleshi, i dënuar me 17 vjet burg për grabitje dhe vrasje në kuadër të “Bandës së Niklës”. Grupi i hetimit bëri me dije se ka përjashtuar pistën hetimore të atentatit për shkak të detyrës, pasi nuk janë gjetur prova për këtë pistë.
(Boldnews)
