“Frank Ribery është një nga lojtarët më të rëndësishëm në historinë e Bayern. Jemi të kënaqur që është rikthyer,” shprehet trajneri i Bayern gjatë konferencës për shtyp në prag të ndeshjes së nesërme kundër Mainz. Bayern kishte një orë që po mundohej të zhbllokonte rezultatin gjatë ndeshjes së fundjavës kundër Wolfsburg, më pas futet në fushë Ribery për Robben, dhe ritmi i lojës ndryshon menjëherë. Nëpërmjet një driblimi dehës nis ai aksionin e golit të avantazhit. Dhe ul topin me gjoks për Lewandowski për golin e dytë pak më vonë. 4.4 km vrapoi Ribery në 34 minutat që ishte në fushë. 15 sprinte bëri francezi, një më shumë se Douglas Costa, i cili ishte më tepër në fushë se Ribery.
Tashmë ka filluar një luftë për një vend titullari për Ribery dhe Costa, por Guardiola është i qetë: “Mund të luajnë edhe së bashku.” A do të jetë ndeshja e nesërme, e vlefshme për Kupën e Gjermanisë kundër Mainz, mundësia e parë për t’i vëzhguar të dy në të njëjtën kohë? Guardiola nuk e përjashton si mundësi, teksa duket i lumtur për alternativat që ka në sulm. Ribery, Costa, Robben, Coman, Lewandowski, Gotze, Muller. “Kam shtatë sulmues,” thotë Pep, i cili më në fund mund t’i japë një shans edhe Mario Gotze-s.
Në javët në vazhdim do të tregohet se cili do të mbaj larg egon e tij për hir të ekipit. “Me 16 lojtarë është më e vështirë për të pasur harmoni. Do të ishte më e thjeshtë po të ishin 11 lojtarë dhe të gjithë ta dinin që do të luanin,” është shprehur Muller para disa ditësh. Edhe Ribery do të kërkojë një vend titullari së shpejti, shifrat flasin për të. Në 86 minuta të luajtura ai ka qenë i përfshirë në tre gola./ Telesport.al
