Ndihmoi një emigrant për t’u pajisur me pasaportë biometrike, përfundon në pranga oficeri i policisë.
Policia në Malësinë e Madhe ka ndaluar një efektiv policie, i cili ka tentuar që të falsifikojë një pasaportë biometrike në favor të një shtetasi. Sipas Prokurorisë Shkodër, efektivi i policisë Faik Ujka është ndaluar për falsifikim në procedurat e pajisjes me pasaportë biometrike.
Në bazë të hetimeve, Komisariati i Policisë Malësi e Madhe, me shkresën nr. 2033 e protokolluar me 19 gusht të 2016-ës, ka përcjellë në Bashkinë Koplik 12 praktika të ndryshme të personave që kanë aplikuar për t’u pajisur me pasaportë biometrike. Sipas organit të akuzës, më 19 gusht 2016 kur janë përcjellë ato 12 praktika, sipas procesverbalit përkatës të këqyrjes rezulton se në Komisariatin e Policisë Malësi e Madhe në detyrë ka qenë si patrullë oficeri Ujka.
Gjithashtu, edhe në procesverbalin e këqyrjes së regjistrit në Zyrën e Gjendjes Civile në Koplik rezulton se praktikat me nr. 2033 të protokolluara më 19 qershor 2016, pra edhe para dy muajsh përpara se të dërgohen në Komisariatin e Policisë, janë dorëzuar nga i njëjti efektiv, shtetasi Faik Ujka. Prokuroria bën me dije se në atë shkresë që Ujka i ka dorëzuar Bashkisë Malësi e Madhe ka shtuar me shkrim dore emrin Admir Piranaj dhe praktikën përkatëse të këtij shtetasi.
Organi i akuzës vijon më tutje, duke thënë se sipas aktit të ekspertimit përkatës ka rezultuar se emri i shtuar i Admir Piranajt si dhe shkrimet në formularin e aplikimit për pajisjen me pasaportë biometrike në emër të shtetasit Pirana, janë shkruar nga i dyshuari Faik Ujkaj.
Po ashtu, edhe vulat e Komisariatit të Policisë Malësi e Madhe dhe nënshkrimi i shefit të komisariatit në formularin e pajisjes me pasaportë biometrike në emër të Admir Piranaj janë të falsifikuara. Sipas Prokurorisë, shtetasi Faik Ujkaj është ndaluar nga Policia sepse ndaj tij është vendosur masa e sigurimit “arrest me burg” nga Gjykata e Shkallës së Parë në Shkodër.
I gjithë ky hetim është bërë nga Prokuroria e Rrethit Shkodër pas afro dy vitesh hetime për këtë çështje. Kështu, efektivi i policisë Faik Ujka akuzohet për veprat penale “shpërdorimi i detyrës dhe “falsifikim i dokumenteve”, pasi ky punonjës policie në patrullë, sipas Prokurorisë Shkodër dyshohet se ka falsifikuar një praktikë për pasaportë biometrike në favor të shtetasit Admir Piranaj.
Prokuroria vijon hetimet për këtë rast, ndërsa efektivi Faik Ujka tashmë do përballet në Gjykatën e Shkallës së Parë në Shkodër lidhur me akuzat në këtë çështje ndaj tij