Nga Boldnews.al
Ambasadori amerikan në Tiranë Donald Lu pas shumë ditësh harresë sot doli në publik dhe lëshoi deklaratën e radhës, të cilat në fillim nga media konsideroheshin si “bombë”, ndërsa tani ngjajnë me shashka që nuk trembin askënd. Lu përmendi disa emra nga ish-deputetë, kryebashkiakë e ish-kryebashkiakë, apo personazhe të krimit. Në fund nuk harroi që të thotë se politikanët e korruptuar do e kenë radhën… Historia e deklaratave të Lu konsideroheshin të forta kur etiketonte gjyqtarët e prokurorët si të korruptuar, kur deklaronte se opozita po bëhej pengesë për reformën në drejtësi, apo shpalli luftë të hapur me ish-kryeprokurorin Adriatik Llalla. Këto mbehen mend si “bomba të ambasadorit”, ciflat e të cilës preknin vetëm anën opozitare, ndërsa u kursye pa fund me qeverinë, atë që drejton vendin në pesë vite dhe mban përgjegjësi për gjithçka shkon keq në vend. Por dje Lu kërkoi sërish të zërë hapësirë në lajmet kryesore të ditës, për të eklipsuar qoftë edhe për pak dorëheqjen e Saimir Tahirit si deputet.
“Gazetarë të guximshëm ishin të gatshëm të shkruanin për Arben Ndokën, Roshin, Aqif Rakipin, Shukri Xhelilin, falë këtyre gazetareve këta politikanë s’janë më në Kuvend apo bashki”-deklaroi ambasadori Lu, pas shumë e shumë ditësh qëndrim në heshtje. Javë më parë, asnjë fjalë nuk tha për mbrojtjen që iu bë Tahirit nga Rama, asnjë reagim për kushtet e BE-së në lidhje me çështjen Tahiri që na rrezikojnë edhe marrjen e statusit të vendit kandidat për në BE. Dje, ambasadorit Lu i ishte çliruar, gjuha dhe artikulimi ishte mëse i rrjedhshëm kur deklaroi se: “Dy urdhër-arreste janë lëshuar edhe për dy peshq të tjerë. Klement Balili dhe Arbër Çekaj. Ata duhet të kapen. Fran Frrokaj dhe Roshi po ndiqen penalisht, hetimet po vazhdojnë ndaj Tahirit dhe Llallës, askush nuk është mbi ligjin. Mirëpresim faktin që zoti Tahiri do përballet me drejtësinë si qytetar i zakonshëm pa imunitet. Duhert të ndihmoni publikun të kuptojnë pse keta persona janë kaq të rrezikshëm”-shtoi Lu. Dje ishte në një ditë të mirë, pasi sipas tij dorëzimi i mandatit të Tahirit në një lloj mënyre është edhe “meritë” e trysnisë nga diplomacitë e huaja në Shqipëri.
Po pse doli pikërisht sot dhe jo në kohën kur fjala e tij do kishte peshë? Nuk është në gjendje t’i përgjigjet pyetjes se si nga ana e tij nuk pati asnjë deklaratë zyrtare kur vendi u kanabizuar në vitin 2016. Përse nuk “gjente fjalë” të thonte kur tonelata me drogë mbushën bregdetin e Italisë apo Greqisë, si pasojë e mbiprodhimit. Heshti kur korrupsioni zyrtar kapi gjithnjë e më shumë majat. Ambasadori Lu gjithashtu nuk gjeti “kohë” të reagonte për raportin e shtetit të tij në lidhje me konkluzionet se kurrupsioni në Shqipëri është i shtrirë në të gjithë nivelet e qeverisjes. Mënyra si i trejton fenomenet shqetësuese në vend gjatë kohëve të fundit duke mos reaguar kur ka skandale të mëdha korruptive dhe shigjeton opozitën për reformën në drejtësi, nuk është as më shumë e as më pak sesa qëndrimi “zyrtar” i kryeministrit Edi Rama.