Është publikuar momenti i atentatiti mafioz të ndodhur mesditën e djeshme në aeroportin e Rinasit, i cili i mori jetën Gilmando Danit dhe la të plagosur rëndë Muçi Shaljanin, punonjës i Agjencisë së Mbikëqyrjes Policore (AMP).
Ngjarja ndodhi rreth orës 14:20 të 11 nëntorit 2025, kur persona të paidentifikuar hapën zjarr me breshëri kallashnikovi ndaj automjetit ku ndodhej viktima.
Pamjet tregojnë se mjeti është qëlluar nga autorët e maskuar dhe të veshur me uniforma të ngjashme me ato të policisë. Në një moment, njëri prej tyre shihet duke zbritur nga automjeti, rimbushur armën dhe qëlluar sërish në drejtim të Danit, i cili ndodhej në sediljen e pasagjerit.
Pas të shtënave, autorët janë larguar me shpejtësi drejt Fushë-Krujës, ndërsa kalamitarë të rastit janë përpjekur të ndihmojnë personat në automjet.
Dyshohet për informatorë nga Spanja
Gilmando Dani dhe Muçi Shaljani sapo ishin kthyer nga një udhëtim në Barcelonë ku kishin fluturuar prej datës 7 nëntor të këtij viti. Pas zbritjes në Rinas ata kanë marrë nga parkimi mjetin tip “Mercedes Benz“ (në pronësi të Elvis Kosovës) dhe sapo janë afruar pranë rrethrrotullimit të Rinasit, të shtëna me armë kanë nisur drejt tyre nga një mjet tjetër tip “Toyota“ blu e errët.
Dyshohet se atentatorët kanë pasur informatorë që në Spanjë, për shkak se avioni është vonuar me disa orë. Sic raportohet, avioni supozohet të ulej në Shqipëri në orët e para të mëngjesit, por më pas udhëtimi është shtyrë për në drekë.
Ndërkohë në Rinas, makina “Toyota” ka pritur ekzaktësisht 10 minuta në rrethrrotullim i ndaluar.
Pak minuta më vonë, mjeti i autorëve është gjetur i djegur në fshatin Halilaj nga forcat e policisë dhe zjarrfikësit ku janë gjetur 4 armë zjarri e kallashnikovë, ndërsa ka dyshime se kanë qënë 4 bashkëpunëtorë.
Ngjarja ka ndodhur në një zonë me prani të lartë policore, ku patrullat e rendit, të trafikut dhe forcat e sigurisë së aeroportit janë të përhershme. Pavarësisht kësaj, autorët kanë mundur të ekzekutojnë atentatin dhe të largohen, duke ngritur edhe njëherë pikëpyetje serioze mbi efikasitetin e strukturave të sigurisë dhe nivelin e kontrollit shtetëror në zonat më të mbrojtura të vendit.
Fakti që Dani udhëtonte në automjet me Shaljanin, punonjës i AMP-së nxit debate të forta mbi marrëdhëniet mes botës së krimit dhe strukturave të policisë, si dhe mbi rrezikun e infiltrimeve të mundshme brenda institucioneve ligjzbatuese.
Ironikisht, ngjarja ndodhi vetëm disa orë pasi Ministrja e Brendshme, Albana Koçiu, deklaroi publikisht se “Shqipëria është ndër vendet më të sigurta të rajonit”. Por atentati në mes të ditës, në një nga zonat më të mbrojtura të Tiranës, e vë në pikëpyetje këtë imazh të sigurisë që ministrja përpiqet të përcjellë.
Sakaq lidhur me rastin bëhet me dije se janë ngritur postblloqe në akset hyrëse dhe dalëse të kryeqytetit, ndërsa hetimet janë në fazën e parë. Gjithashtu janë sekuestruar pamjet e kamerave të sigurisë të aeroportit dhe të bizneseve përreth.
