Drejtuesi i ‘Acromax’, ka folur së fundmi për një ndër temat më të përfolura ditëve të fundit, blerjet e klikimeve nga artistët shqiptarë. I ftuar në programin ‘Ndryshe’, Aldor Nini zbuloi dhe emrat e disa prej këngëtarëve të cilët e bëjnë këtë gjë.
“Ne kemi një listë shumë të gjatë artistësh që ne i menaxhojmë. Të gjithë atyre i ka shkuar në majë të hundës pjesa e blerjes së klikimeve, pjesa më e madhe e do këtë gjë, nuk duan të konkurrojnë me artistë të tjerë që i blejnë klikimet. Nuk i kemi vënë në dukje më parë, tani ka ardhur momenti.
Personi pasi pa lajmin më tha që ‘çfarë të duhet ty që fut hundët’. Është Ardit Çuni. I thashë Arditit mua mu deshën gati 10 sekonda të gjeja Shqipërinë, aq poshtë ishte. 668 klikime ka vetëm nga Shqipëria, 37 mijë klikime nga India.
Alban Ramosaj, kam shumë respekt për të, por kënga ‘A je me najkon’ ka vetëm 13 mijë shikime nga Shqipëria. Kjo mendoj se është viktimë dhe jo që i ka blerë vetë.
Ergita Bahja ka kënduar te ‘Kënga Magjike’. Kishte më shumë nga Kazastani.
Një nga artistët që nuk ka aspak nevojë të blejë klikime por ka dalë në sistemin tonë është Ledri Vula, kishte blerë klikime te kënga ‘Monaco’”- tregoi ai.
Mirëpo pas deklaratës së Ninit, ka ardhur dhe reagimi i Alban Ramosajt dhe Ardit Çunit.
Albani reagoi duke ironizuar nëpërmjet një postimi në InstaStory ku shkroi: “Për sa kohë jam lajmi, faleminderit!”.
Ardit Çuni ka publikuar një bisedë që duket se është realizuar me drejtuesin e Acromax, ndërsa shkruan: “Besoj se me këtë bisedën dhe me disa të tjera si kjo, është e qartë se pse është përmendur emri im dhe i disa artistëve të tjerë sot. E keni parasysh DHELPRA DHE RRUSHTË.”
Në një tjetër postim, ai ka publikuar statistikat e Youtube për disa nga këngët e tij. Më pas, ai ka bërë një tjetër reagim drejtuar Ninit, duke shkruar se ai “nuk ka qenë kurrë artist i klikimeve” ndërsa këtë e bën si një mënyrë për ta shantazhuar të bashkëpunoje me kompaninë e tij.
“Nuk kam qenë ndonjëherë artist i klikimeve edhe kur “Jena Na” qëndronte për 6 javë në vend të parë në 2016 dhe kishte 600,000 klikime. Vazhdojmë njëzëri në koncerte dhe mezi i ka 3.5M. Kur “Qaj” bënte namin dhe luhej në çdo radio, makinë, anembanë, mezi kishte 3 milionë klikime.
Intervista e mia, komentet e mia, kanë mijëra klikime, se dija që i kam blerë klikimet nëpër Big Brother, apo Tv të ndryshme që më ftojnë të jem pjesë e programacionit të tyre”- shkruan Arditi.
Më pas ai i drejtohet personalisht Aldor Ninit, CEO-s së “Acromax”, duke i thënë se e ka shantazhuar për të punuar me kompaninë e tij, dhe duke shtuar se ai i ka mësuar artistët të blejnë klikime.
“Aldor i dashur që shyqyr nxorre kokën, se deri dje më luteshe të isha pjesë e kompanisë tënde, sot në mëngjes në mënyrë të sofistikuar më shantazhoje që o të promovoja këngët me ty ose do të dilje të flisje në TV.
Përpara se të flasësh për klikimet tona “të blera”, më mirë ti tregosh shqiptarëve nga kush mësuan t’i blinin, pikërisht nga ti. Është më mirë t’ju tregosh statistikat e klientëve të tu që marrin 1 milionë në natë, nga India besoj edhe ata?”- thuhet mes të tjerash në statusin e Arditit.
Në përfundim, këngëtari shkruan se në treg e ka mbajtur vetëm puna e tij: “Mua deri sot në këtë treg më ka mbajtur vetëm djersa dhe puna ime dhe këtë e them me sigurinë dhe krenarinë më të madhe”- shkruan ai duke shtuar se nuk donte të reagonte sepse sipas tij një këngë nuk e bëjnë klikimet. Megjithatë ai nuk shkroi një arsye konkrete se pse zgjodhi të reagojë.
