Pse mungon Basha në debatet televizive? E zbulon Andi Bushati…

Kush i ndjek emisionet e mbrëmjes me vëmendje, ka vënë re me siguri se që prej fillimit të këtij sezoni lideri i opozitës nuk është shfaqur në asnjë prej emisioneve të mëdha në “prime time”. Lulzim Basha nuk ka bërë asnjë paraqitje në studio, as tek “Opinion” i Fevziut, as tek “Open” i Eni Vasilit, as tek Artur Zheji, apo Sokol Balla.

I vetmi nga PD që ka pasur “luksin” e përballjes me gazetarët ka qenë ish lideri Sali Berisha. Dy prej këtyre drejtuesve të emisioneve, që për hir të ruajtjes së diskrecionit dhe mosprishjes së marëdhënieve nuk kanë dashur të prononcohen, kanë deklaruar “off” për Lapsi.al, se e kanë ftuar disa herë liderin e opozitës, nuk kanë marrë një “JO” të prerë prej tij, por në fund nuk kanë pasur sukses.

‘Unë kam dashur ta kem në emision që prej qershorit të kaluar, menjëherë pas ultimatumeve të amerikanit Palmer dhe mbajtjes së zgjedhjeve lokale, por pa sukses. Po ju gaboheni kur thoni në shtator, Basha mungon në emisionet kryesore që prej pranverës së shkuar, pra pak a shumë që prej kohës që kur dogji mandatet dhe nuk shkeli më në kuvend” tha një nga drejtuesit e emisioneve për Lapsi.al.

Në fakt, në qershor të vitin të shkuar në një lidhje të drejtëpërdrejtë (jo në studio) në emisionin Opinion, Basha i bëri thirrje mbështetësve të tij të mos i shikonin më televizione se Klan dhe Top, të cilat ai i konsideroi si vegla qorre të qeverisë që dezinformojnë për llogari të saj. Por vështirë të besohet se mungesa e tij e gjatë në ekrane lidhet me këtë qëndrim.

Shumë vëzhgues të politikës e lidhin këtë taktikë me dështimin e rrugës radikale dhe me pamundësinë për t’iu përgjigjur disa pyetjeve si përshembull: Thatë se nuk do lejonit zgjedhjet lokale dhe votimet u bënë; thatë se nuk do lironit bashkitë dhe në to hynë socialistët; thatë se do vazhdonit me protesta dhe i braktisët; thatë se s’ka marrveshje me Ramën apo ulje në tryezë me Gjiknurin dhe gënjyet…

LEXO EDHE  Koronavirusi, për herë të parë më shumë raste të reja jashtë Kinës sesa brenda saj

“Pavarësisht nga këto patate të nxehta, të cilave është vështirë t’u përgjigjesh, përsëri Basha po sillet në mënyrën e gabuar” tha për Lapsi.al një ekspert që është marrë shkurt me këshillimin e tij. “Basha sillet si dikush që kujton se po se njohu ai një realitet, ky realitet nuk ekziston. Por kjo në shkencën e politologjisë konsiderohet si një gabim, e para se e lë fushën bosh për të luajtur rehat të tjerët dhe së dyti sepse edhe kur ke pak gjë për tu justifikuar është më mirë të mbrosh versionin tënd. Shikoni rivalin e tij Ramën edhe kur është përballë skandaleve më të mëdha edhe kur kapet me preshë në duar, është gjithmonë prezent për të bërë dominant këndvështrimin e vet për ngjarjen. Ndoshta në planin human kjo është një meritë e Bashës, sepse atij nuk i është trashur aq shumë lakura sa ta bëjë paturpësisht të zezën të bardhë, por politikisht kjo lloj sjellje me frikën për tu përballur, ndëshkohet» pohoi ai.

Por, megjithë këtë debat shefi i opozitës mungon prej një kohe pajustifikueshmërisht të gjatë në ekrane, pavarësisht se drejtuesve të emisioneve kryesore u premton pothuajse çdo javë, se shumë shpejt do të jetë në studion e tyre. /Lapsi/