Aksident me vdekje/ Rrezikon dënim kapital, Apeli i Durrësit pezullon ekstradimin e të riut në Kanada

Nga Boldnews.al

Gjykata e Apelit të Durrësit, në një vendim të rrallë për gjyqësorin shqiptar që u bindet kërkesave të huaja, ka pezulluar përkohësisht ekstradimin e një shtetasi shqiptar drejt Kanadasë, i cili rrezikon dënimin e përjetshëm për shkelje të qarkullimit rrugor me pasojë vdekjen.

Trupa e Apelit të Durrësit kërkon garanci paraprake nga autoritetet kanadeze që 39-vjeçari E.K, nga Elbasani, i arrestuar për efekt ekstradimi në Korrik 2019, të mos marrë dënim me burgim të përjetshëm.

Deri në marrjen e një garancie të tillë, Gjykata e Apelit të Durrësit ka vendosur në 16 Janar 2020 që të shtyjë vendimin për miratimin ose jo të ekstradimit të E.K. drejt Kanadasë, si edhe shtyrjen edhe me një muaj të masës së sigurimit ”arrest me burg“ ndaj tij.

Në bazë të rregullave për ekstradimet, një shtetas shqiptar mund të dërgohet para autoriteteve të një vendi të huaj, kur, ndër të tjera, vepra penale për të cilën dyshohet jashtë Shqipërisë, parashikohet si e tillë edhe në ligjin vendas.

Në rastin konkret, vepra për të cilën dyshohet se ka kryer në Kanada E.K., nga Elbasani, “neglizhencë me pasojë vdekjen” është e njëjtë me atë që parashikon Kodit Penal shqiptar “shkelje të rregullave të qarkullimit rrugor me pasojë vdekjen“.

Por, ndërmjet dy legjislacioneve, atij shqiptar dhe atij kanadez, ka një diferencë thelbësore përsa i përket marzhit të dënimit.

Kodi Penal Shqiptar parashikon dënim me maksimum deri në 10 vjet burgim për “aksidentet me pasojë vdekjen“. Ndërkohë, politika penale e Kanadasë për vepra të tilla është shumë herë më e ashpër, duke parashikuar dënim deri në burgim të përjetshëm.

Pikërisht, kjo masë ekstreme e legjislacionit kanadez, ka stepur Gjykatën e Apelit të Durrësit për të dhënë miratimin për ekstradim, pa marrë më parë garancinë dhe sigurinë se shtetasi shqiptar nuk do të mund të dënohet me ekstremin.

Për të marrë këtë garanci, Gjykata e Apelit të Durrësit ka kërkuar ndërhyrjen e Ministrisë së Drejtësisë së Shqipërisë, që të komunikojë me homologët e tyre kanadezë.

LEXO EDHE  Tubimi i Metës më 2 mars/ Çlirim Gjata: Po dalim si qytetarë, Presidenti po mbron Kushtetutën

Deri në 16 Janar 2020, Ministria e Drejtësisë nuk rezulton të ketë marrë apo dërguar asnjë informacion në Gjykatën e Apelit, përsa i përket garancive të kërkuara nga trupi gjykues.

Për këtë arsye, trupa gjykuese ka vendosur të shtyjë edhe me një muaj masën e sigurisë “arrest me burg“ për shtetasin E.K., kohë, në të cilën Gjykata vlerëson se mund të marrë një përgjigje nga Ministria e Drejtësisë.

Në vendimin e Gjykatës së Apelit të Durrësit, të cilën “Boldnews.al“ e ka siguruar të plotë, jepen edhe detaje të përgjithshme mbi ecurinë e procesit penal ndaj shtetasit E.K.

Ai është arrestuar nga Policia në Elbasan, në Korrik 2019, në bazë të një urdhër-kërkimi ndërkombëtar të lëshuar nga Gjykata e British Columbia Kanada, si person i dyshuar për “neglizhencë me pasojë vdekjen“.

Gjykata e Elbasanit ka miratuar kërkesën për ekstradimin e tij drejt Kanadasë. I arrestuari e ka kundërshtuar këtë vendim në Gjykatën e Apelit të Durrësit, duke kërkuar refuzimin e ekstradimit dhe shuarjen e masës së sigurisë.

Siç deklaron gjykata e Apelit në vendim e datës 16 Janar 2020, seancat gjyqësore pranë saj: ”jane shtyrë pasi, nga ana e kësaj gjykate, i është kërkuar informacion Ministrisë së Drejtesisë së Republikës së Shqipërisë, në lidhje me dhënien e garancisë nga ana e Autoriteteve Kanadeze, për mos aplikimin e dënimit me burgim të përjetshëm”.

Gjykata vijon më tej: ”Provohet se deri në ditën e sotme nuk ështe kthyer përgjigje nga Ministria e Drejtësisë në lidhje me konfirmimin që duhet t‘i bëjë Departamenti i Drejtësisë së Kanadasë, pasi Ministria e Drejtësisë së Republikës Shqipërise i është drejtuar me shkresën datë 28.10.2019“.

Në këto kushte, gjykata e Apelit ka vendosur të pranojë kërkesën e Prokurorisë për të shtyrë edhe me një muaj masën e sigurisë “arrest me burg“ për E.K., në pritje të një përgjigjeje nga ana e Ministrisë së Drejtësisë.