“Nuk ka marrëveshje me Ramën”/ Nishani: Tryeza për Reformën Zgjedhore, opozita mori vendin që i takonte

Ish-Presidenti Bujar Nishani ka reaguar përmes një komenti lidhur me marrëveshjen mes opozitës së bashkuar dhe Rilindjes për reformën zgjedhore. Por për Nishanin, tryeza për reformën zgjedhore nuk është kurrfarë marrëveshje.

“Opozita nuk ka shkuar asgjëkundi ku nuk i takon apo e kanë ftuar. Maxhoranca dhe opozita janë ulur në vendet e një proçesi politik që ju përket atyre për shkak të asaj që përfaqësojnë”, shkruan Nishani.

Ish-Presidenti thekson se Edi Rama nuk do të donte kurrë të ekzistonte kjo tryezë ndaj nguli si provokim aty Damian Gjiknurin me qëllimin e vetëm që opozita të refuzonte dhe të lëshonte vendin e vet politik në një proçes detyrash prej politikës.

“Gjiknuri është thjesht mekanizmi i një sistemi kriminal dhe korruptiv të manipulimit zgjedhor.

Sistemi vetë është Edi Rama.

Kush mendon se Gjiknuri do t’i ikë drejtësisë për jetësimin që i bëri sistemit kriminal e ka shumë gabim.

Edhe nëse opozita nesër në pushtet degradon dhe nuk kërkon drejtësi, atë nuk do ta harrojnë dhe lejojnë shqiptarët.

Shkrirja e mekanizmave të vjedhjes së zgjedhjeve do të nisë me çmontimin e sistemit kriminal, vetë Edi Ramës. Ndaj në proçesin e reformës zgjedhore pak rëndësi ka ndërtimi i asaj tryeze. Ajo që është themelore për opozitën dhe shqiptarët është produkti i saj”, shkruan Nishani.

Nga Bujar Nishani

Regjimi monist dhe më i korruptuari i këtyre 30 viteve të fundit po përpiqet të krijojë një tezë spekulimi për t’i ikur thelbit dhe përgjegjësisë madhore me propagandën e tij të sëmurë, për tryezën e reformës zgjedhore.

Regjimi i votave të vjedhura, i bashkëpunimit dhe vëllazërimit me krimin e organizuar po tenton ta quajë atë tryezë si një “marrëveshje ku opozita vajti kokëulur”.
Në fakt këtij regjimi nuk i ka mbetur të thotë më asgjë, veçse propagandës së sëmurë mjerane.

Tryeza për reformën zgjedhore nuk është kurrfarë marrëveshje. Opozita nuk ka shkuar asgjëkundi ku nuk i takon apo e kanë ftuar. Maxhoranca dhe opozita janë ulur në vendet e një proçesi politik që ju përket atyre për shkak të asaj që përfaqësojnë.

LEXO EDHE  Protesta e 2 marsit, Meta falenderon regjizorin e njohur: Jemi komb shqiponjash, do kthehen në folenë e tyre

Blloqet politike, të përcaktuara nga qytetarët shqiptarë!

Reforma zgjedhore prej kohësh është përcaktuar si një proces politik i detyrueshëm prej arbitrit ndërkombëtar që monitoron dhe vlerëson proçeset zgjedhore ! OSBE/ODIHR.

Ajo çka është e veçanta në këtë proçes është fakti që opozita e detyroi mazhorancën ta nxjerrë procesin jashtë Parlamentit, duke pranuar faktin e pakontestueshëm tashmë të delegjitimitetit të atij Parlamenti.

Kushdo e ka të qartë se ai Parlament sot nuk ka legjitimitet kushtetues, nuk ka legjitimitet politik, nuk ka moral qytetar, nuk ka kapacitet institucional.

Opozita që i kishte identifikuar prej kohësh këto dimensione skandaloze të këtij Parlamenti, detyroi më në fund edhe mazhorancën ta pranojë atë realitet të hidhur duke u ulur në tryezën jashtë parlamentare për reformën zgjedhore.

Edi Rama nuk do të donte kurrë të ekzistonte kjo tryezë ndaj nguli si provokim aty Gjiknurin me qëllimin e vetëm që opozita të refuzonte dhe të lëshonte vendin e vet politik në një proçes detyrash prej politikës.

Gjiknuri është thjesht mekanizmi i një sistemi kriminal dhe korruptiv të manipulimit zgjedhor.

Sistemi vetë është Edi Rama.

Kush mendon se Gjiknuri do t’i ikë drejtësisë për jetësimin që i bëri sistemit kriminal e ka shumë gabim.

Edhe nëse opozita nesër në pushtet degradon dhe nuk kërkon drejtësi, atë nuk do ta harrojnë dhe lejojnë shqiptarët.

Shkrirja e mekanizmave të vjedhjes së zgjedhjeve do të nisë me çmontimin e sistemit kriminal, vetë Edi Ramës. Ndaj në proçesin e reformës zgjedhore pak rëndësi ka ndërtimi i asaj tryeze. Ajo që është themelore për opozitën dhe shqiptarët është produkti i saj.

Produkti që të kemi zgjedhje të lira, të drejta dhe të ndershme, jashtë ndikimit të krimit të organizuar dhe korrupsionit qeveritar. Askush të mos çuditet që këtë proçes Edi Rama do të tentojë ta minojë çdo ditë.

E ndërkohë propaganda tipike e rilindsit do vijojë të ngrejë kurthe. E megjithatë sfida qëndron tek produkti !