Rama na bëri atë që nuk mundën as pushtuesit

Nga Boldnews.al

Rama, Rilindja e tij, nëpunësit e shtetit dhe një numër i madh pensionistësh, që shtyjnë ditët nën varfëri, hesape për listat e ilaçeve dhe dridhje duarsh kur u dalin nga duart shuma gati sa një pension për faturat e fryra të energjisë dhe ujit të pijshëm që nuk pihet.
Kjo është panorama e sotme pas shtatë vitesh qeverisje të kryeministrit Edi Rama. Vendi është shpopulluar ku mbi 450 mijë qytetarë vetëm në kohën e qeverisjes së tij janë larguar nga vendi për shkak të papunësisë, varfërisë, mungesës së shërbimeve, padrejtësisë dhe korrupsionit masiv të pushtetit. Shumë të tjerë janë gati të marrin arratinë në një nga vendet e BE-së, për ti kthyer shpinën ndoshta përgjithnjë vendit ku lindën e u rritën.
Kaq shumë njerëz nuk i njeh as historia të jenë larguar, në pak kohë, as në periudhë luftash dhe as nga gjenocidet. Nëse do të duhej një plan i detajuar për ti ulur fuqinë Shqipërisë në rajonin e Ballkanit, këtë e ka bërë qeverisja.

“Stop shpopullimit të Shqipërisë! Ky është “rreziku i vërtetë rus” që i kanoset vendit”- shkruan presidenti Ilir Meta në një postim në faqen e tij në Facebook, teksa shton se “Kjo është sfida më madhore që kërkon urgjent dialog, zgjidhje, dhe kthimin e shpresës për të gjithë shqiptarët”. “Nuk mund të ketë Shqipëri pa shqiptarë”.

Me siguri që pas këtij postimi “minjtë e magazinave” me ideale Rilindje, me kompjuter dhe internet përpara do nisin sulmin ndaj kreut të shtetit. Do thonë e ç’nuk do thonë. Do ngrejnë në piedestal lartmadhëninë e tij Edi Rama, duke e konsideruar një vizionar. Ikjet masive të të rinjve kryeministri Edi Rama i konsideron si zhvillim, që për të ata largohen për një jetë më të mirë dhe sipas tij edhe pse Shqipëria ka ndryshuar dhe është në lulëzim nën udhëheqjen e tij, emigrime do të ketë.

LEXO EDHE  Rikthehen reshjet/ Parashikimi i motit, ja zonat ku priten vranësirat e dendura...

Edhe pse një shtet i vogël, pa ndikim në politikën e madhe ndërkombëtare Shqipëria ia ka ulur forcën edhe më shumë vetes. Po sot nuk bëhet fjalë për ikje në shifra të ulëta, por largime masive si fillim të fuqisë punëtore dhe më pas në tre vitet e fundit po shihet një braktisje e vendit nga mjekët, infermierët, inxhinierët, arkitektët dhe punëtorët e kualifikuar.

“Në Shqipëri në vitin 2100, sipas pritshmërive të departamentit të Divizionit të Popullsisë të OKB-së, në Shqipëri nuk pritet që të mbeten më shumë se 512 mijë banorë. Më parë, pritshmëria ishte për 860 mijë banorë, pra parashikimi është ulur me 40%”. Ky është përfundimi i studimit të OKB-së në lidhje me Shqëipërinë. Ajo e ka renditur ndër vendet që në dekadat në vijim do të ketë tkurrjen më të madhe që vjen si pasojë e emigracionit masiv dhe uljes së lidshmërisë në vend.

Kur vendi të ketë mbërritur në 512 mijë banorë në vitin 2100, pra pas 80 viteve, me siguri do të ketë një studiues që kryeministrin tonë të sotëm do e rendisë si personin kyç që me politikat e ndjekura “shfarosi” popullin e tij!