Nga Boldnews.al
Protesta e banorëve të Unazës së Re po tregon ditë pas dite edhe ndërprerjen e raporteve ndërmjet Edi Ramës dhe kanakarit të tij në krye të Bashkisë së Tiranës, Erion Veliaj. Prej më shumë se dy javësh, qindra banorë të periferisë perëndimore të Tiranës po kundërshtojnë, me bllokim rruge, ndërtimin e Unazës së Madhe, projekti i së cilës prish banesat dhe ndërtesat e tyre.
Ky projekt është miratuar nga institucionet e qeverisjes qëndrore dhe do të zbatohet nga qeverisja vendore e Lali Erit. Pra, si Edi Rama, ashtu edhe Erion Veliaj, janë bashkëhartues dhe bashkëzbatues të rrugës, e cila do të lërë në qiell të hapur mijëra qytetarë.
Protesta e banorëve ka vënë në shënjestër Erion Veliajn, i cili tashmë gjendet i vetëm, pa përkrahjen e Edi Ramës dhe qeverisë së tij përballë revoltës qytetare. Kryeministri ka folur vetëm një herë dhe në mënyrë përciptas për këtë protestë. Në përballjen me një panel gazetarësh në Report Tv para pak ditësh, Rama u shpreh se ndërtimet e protestuesve do të prishen, pasi janë pa leje dhe pengojnë zhvillimin e Unazës së Madhe të Tiranës. Vetëm kaq. Asnjë deklaratë më tepër në mbi dy javë për këtë bombë sociale në zemër të kryeqytetit.
Nga ana tjetër, Erion Veliaj, pa asnjë mbështetje qeveritare, detyrohet t’i qëndrojë sa më largt zonës së protestës, si “Djalli i qëndron larg temjanit”. Ai e ka kuptuar se pa mbështetjen e Edi Ramës, imazhi i tij i kuruar deri në detaje nga mediat-vasale, po bjerret me shpejtësi marramendëse për shkak të kësaj proteste.
Dalja e fundit publike e dyshes Rama-Veliaj daton rreth dy muaj më parë. Duke marrë në konsideratë se si njëri, ashtu edhe tjetri, dalin përditë, madje më shume se një herë në ditë në media, dallohet qartësisht mungesa e paraqitjes dyshe të tyre.
Edi Rama dhe Erion Veliaj kanë dalë së bashku në media në 19 shtator 2018, në inagurimin e shkollës “Kosova”, në hapjen e vitit të ri akademik. Në atë ceremoni, butaforike si përherë, foli vetëm “Lali Eri”. Ndërsa Rama, megjithëse i pranishëm dhe përkundër sjelljes së tij tipike llafazane para medias, qëndroi i heshtur. Ai shërbeu si dekor për “Lali Erin”, i cili rrëzëllinte, jo më shumë për reklamimin e investimin publik, sesa për faktin që kishte në krah Edi Ramën, njeriun që po synon t’i marrë karrigen e kryesocialistit.
Pak ditë para kësaj shfaqjeje, Edi Rama dhe Erion Veliaj ishin së bashku në mbledhjen e grupit parlamentar dhe të qeverisë në Vlorë, në fund të gushtit. Ajo që ra në sy në atë takim ishte fakti se, pavarësisht tentativa të mediave vasale të Lali Erit, nuk u arrit të sigurohej një plan filmik ku ata të dy të ishin bashkë.
Madje, pamje shumë të shëmtuara, sipas kutit të Lali Erit, iu rezervuan publikut kur Edi Rama, gjatë një ecjeje propagandistike, kishte në krah Gramoz Ruçin dhe Taulant Ballën. Pas tyre, në një distancë jo shumë komode për të dëgjuar bisedën, vinte Erion Veliaj.