Nga Boldnews.al
Kryeminstri Edi Rama mblodhi paraditen e së Hënës drejtuesit më të lartë të Policisë së Shtetit për të goditur opozitën, e cila ka rezervat e saj mbi menaxhimin e situatës së rendit në Shqipëri.
Në një takim, i cili dukej si mbledhje e organizatës bazë të Partisë Socialiste, Rama u deklarua si mbrojtës drejtusve të policisë, nga ato që ai i quajti “barbari politike dhe mediatike” ndaj tyre.
Zyrtarët e lartë policorë, një pjesë e mirë e të cilëve kanë karrierë të vlerësuar në biografinë e tyre profesionale në luftën kundër krimit, u detyruan që të dëgjojnë me vëmendje fjalimin e kryeministrit, i cili kishte qëllimin primar që të sulmonte partitë politike opozitare.
Këto të fundit, Rama i konsideroi si “ata që i festojnë me breshëri akuzash dhe shpifjesh vrasjet që ndodhin në Tiranë dhe gjetkë”. Gjithashtu, Rama i konsideroi të tepërta kritikat e opozitës dhe të zërave të tjerë potentë në jetën publike shqiptare, duke u shprehur se “….(ata) kanë nisur një kujë të zezë, kanal më kanal, portal më portal, foltore më foltore e thonë që krimi po bën kërdinë, se policia nuk po lufton krimin, por është bërë njësh me krimin…”
Fjalimi i kryeministrit Rama ishte, si zakonisht, i gjatë, i mbushur me retorikë politikë shoqëruar kësaj radhe me shifra të ulta, sipas tij, të kriminalitetit gjatë periudhës së qeverisjes së Rilindjes.
Asnjë surprizë dhe asnjë të re nuk kishte në fjalimin e Ramës, i cili nisi këtë fillim-jave me marrjen në mbrojtje të ministrit të Brendshëm, Fatmir Xhafaj, i cili është nën akuza të forta se ka përdorur të gjithë pushtetin e tij politik dhe administrativ për të mbrojtur vëllain e tij, Agron (Geron) Xhafaj, i dyshuar se po vijon aktivitetin e paligjshëm të trafikut të narkotikëve.
Rama foli gjatë për “shpifjet”, sipas tij, kundër Policisë së Shtetit. Dhe, natyrisht, këto shpifje ai ia atribuoi opozitës, në këtë takim, ku përballë kishte zyrtarë shtetërorë, të cilët, sipas ligjit, duhet të jenë të depolitizuar.
….Në bazë të ligjit “Për Policinë e Shtetit”, në nenin 4 të tij, thuhet se “Policia e shtetit është e depolitizuar”. Pra, Policia e Shtetit nuk është as e maxhorancës dhe as e opozitës. Po ashtu, në nenin 5 të të njëjtit ligj, parashikohet se “..Policia udhëhiqet nga parimet bazë të…paanshmërisë politike dhe pavarësisë institucionale”.
Pra, teorikisht, Shqipëria është një vend me Polici të pavarur dhe të paanshme politike. Por, duke ndjekur fjalimin e kryeministrit përballë drejtuesve të Policisë, këto parime as nuk respektohen dhe as nuk zbatohen.
Në një situatë normale, sipas asaj që parashikon ligji, drejtuesit e lartë të Policisë ose nuk duhet të merrnin pjesë në një takim me nota patetike politike ose, në momentin që përballeshin me fjalim anti-opozitar të kryeministrit, duhet të largoheshin nga salla.
Natyrisht, në një vend si Shqipëria, ku Policia e Shtetit është tërësisht nën kontrollin qeveritar, as njëra dhe as tjetra nuk mund të ndodhte-pra, shefat e mëdhenj të Policisë janë të detyruar të marrin pjesë në këto lloj takimesh dhe, mundësisht të mbajnë edhe shënime mbi gjithçka thotë kryeministri.
Në të kundër, secili prej tyre që nuk i bindet këtij vullneti politik, do të “fluturojë” nga puna dhe, mund edhe të përjashtohet nga radhët e Policisë së Shtetit.
Atëherë, duke parë këto pamje, nëse thua që ‘Policia e Shtetit është e depolitizuar”, a konsiderohet shpifje ose “fake news”, siç preferon ta konsiderojë kryeministri Rama?