Redoine Faid, njeriu më i kërkuar në Francë, në arrati prej më shumë se 3 muajsh, pas arratisjes spektakolare me helikopter nga burgu i Reau, është kapur mbrëmjen e djeshme në një apartament të Oise, jo larg nga Parisi.
Burri, 46-vjeç, i dënuar shpesh herë për rrëmbime dhe vjedhje, ishte ndër të tjera me vëllain dhe dy nipërit, të ndaluar edhe ata.
Arratisja
Redoine Faid u arratis pasi tre bashkëpunëtorë të tij të armatosur rëndë u ulën me helikopter në oborrin e burgut dhe e morën me vete. 46-vjeçari Faid po shlyente një dënim me 25 vjet burg për një grabitje me armë gjatë së cilës u vra një polic.
Kjo është hera e dytë që Faid u arratis nga burgu. Në vitin 2013, Faid ia mbathi pasi mori 4 roje peng dhe i përdori ata si mburoja njerëzore. Arratinë e parë ai e bëri vetëm gjysmë ore pasi ishte burgosur. Faid është i njohur në Francë jo vetëm për krimet e tij, por edhe për shfaqjet e shpeshta në televizione.
Në vitin 2009, ai shkroi një libër për përvojat e tij, ndërsa rritej në një rrethinë të Parisit mes krimeve dhe shndërrimin e tij në një kriminel. Ai pretendonte se i kishte dhënë fund kësaj jete, por një vit më vonë mori pjesë në grabitjen që i kushtoi sërish lirinë.
Mediat franceze raportuan se në arratinë e fundit, askush nuk mbeti i lënduar dhe operacioni u bë mjaft i lehtë, pasi oborri i burgut nuk ishte mbuluar me rrjetë, si është bërë praktikë në shumë burgje evropiane, pas disa arratish të famshme me helikopter, mes të cilave edhe ajo e Alket Rizait në Greqi.
Helikopteri u largua me shpejtësi dhe u gjet nga policia i djegur.