Marko Rojs ishte autori i golit të parë për Gjermaninë në sfidën ndaj Suedisë që përfundoi 2-1 për “Pancerat”. Sulmuesi i Borusias së Dortmundit hapi ndeshjen në minutën e 48-të të pjesës së dytë. Toni Kros në të 95-tën shënoi golin e fitores që u dha shansin gjermanëve të qëndrojnë në garë për t’u kualifikuar nga grupi. Ndeshja e ardhshme është ndaj Koresë së Jugut që ka 0 pikë pas dy humbjeve. Rojs është optimist se skuadra do të shkojë larg në këtë Botëror.
Ka qenë një ëndërr për ju të luani në Botëror?
Është diçka fantastike të jesh pjesë e skuadrës që nga faza e grumbullimeve dhe më pas të luash në fushë. Po mundohem të ndihmoj skuadrën për të arritur suksese të tjera. Për mua Botërori është një ëndërr e bërë realitet.
Si ishte ndeshja ndaj Suedisë?
Ne e dinim që një barazim nuk do të na bënte punë për më tej. Kërkonim të fitonim me çdo kusht dhe ia arritëm edhe pse ishim në inferioritet numerik, pas daljes me karton të kuq të Boateng. Besuam te forcat tona deri në fund. Në një Botëror të duhet edhe pak fat, të cilin e merituam pas një pjese të dytë shumë të luftuar.
Si ndiheni kur luani me Timo Vernerin?
Kemi një lirshmëri për sa u përket pozicioneve, e rëndësishme është që ato të qëndrojnë të zëna. Ky fleksibilitet të ndihmon gjatë lojës, pasi krijon një konfuzion te kundërshtari. Ishte njësoj si një lojë shahu, ajo lëvizje që bëri Verner në pjesën e dytë duke kaluar në krahun e majtë të sulmit. Krijuam kështu shumë raste për shënim, pasi u bëmë të rrezikshëm për kundërshtarin. E pamë të gjithë se çfarë është në gjendje të bëjë Timo në situatat një kundër një, është një armë plus për ne.
Si e parashikoni ndeshjen ndaj Koresë së Jugut?
Duhet të bëjmë detyrën tonë dhe të fitojmë ndeshjen kundër Koresë. Dhe jo me rezultatin 1-0, por duke shënuar më shumë gola. Do të jetë e vështirë, por ne e dimë se çfarë duhet të bëjmë. Synimi është vetëm fitorja, pa menduar për ndeshjen tjetër në grup.
Pse u bënë kaq shumë ndryshime në ndeshjen ndaj Suedisë?
Trajneri Lëv na tha se kishte në skuadër 23 lojtarë me kualitet të lartë. Kjo u vërtetua edhe ndaj suedezëve. Lojtarët që nuk luajtën në ndeshjen e parë dhanë gjithçka në të dytën për të ndihmuar skuadrën të fitojë takimin.
Goli në minutën e fundit, si e përjetuat?
Ishte një zgjim për ne, që në ndeshjet e ardhshme të luajmë me vetëbesim dhe më të çliruar.
Ishit pranë eliminimit të parakohshëm dhe kjo si kampionët në fuqi, çfarë ndodhi?
Do të japim gjithçka që gjithçka e tillë të mos ndodhë, ashtu siç e treguam ndaj Suedisë. Koreanët do të tentojnë të luajnë me kundërsulme. Dhe do të jenë pa dyshim më të rrezikshëm se suedezët, pasi lëvizin më shpejt. Por, trajneri do të dijë të na udhëzojë në mënyrën e duhur për ta kaluar edhe këtë kundërshtar.
Sa i rëndësishëm është Mario Gomez për ju?
Është shumë i rëndësishëm për ne. Jashtë fushe dhe brenda saj. Me prezencën e tij na shtyu përpara në ndeshjen me Suedinë.