Nga Boldnews.al
Top Channel ka arritur një “fitore” domethënëse në luftën e tij kundër anëtarit të Gjykatës së Lartë, Shkëlzen Selimi, duke mbledhur rreth 15-20 persona, të prezantuar si “shoqëri civile”, të cilët protestonin kundër një prej gjyqtarëve që po shqyrton padinë për pronësinë e televizionit.
Paraditen e së markurës, disa “qytetarë” ishin mbledhur para sallave të mbledhjes së Komisionit të Vetingut dhe, si me regji qëndrore, kërkonin të gjithë largimin e gjyqtarit Selimi. Pavarësisht se shumë televizione kishin operatorët e tyre në ato ambjente, për shkak të dy seancave paralele për Vetingun e një gjyqtari dhe një prokurori, vetëm Top Channel duket se arriti të kapë “lajmin” për protestën e shoqërisë civile kundër gjyqtarit Shkëlzen Selimi.
Një prej folëseve, ndoshta më energjikja, nuk hezitoi aspak ta konsideronte një anëtar të Gjykatës së Lartë si “kriminel”. Në reagimin e saj ndaj gjyqtarit Selimi, folësja përmendi faktin se ai ka qenë relator në çështjen gjyqësore të “Gërdecit”.
Në këtë “protestë”, kamerat e Top Channel kanë fiksuar ndër ata pak njerëz, edhe një djalosh me syze, Ervin Zeneli, nipi i pronares së televizionit, Vjollca Hoxha. Mesa duket, edhe djali i motrës së Vjollcës po e ndjen tashmë dhimbjen për tragjedinë e Gërdecit dhe kërkon nga Komisioni i Vetingut shkarkimin e gjyqtarit Selimi.
Kjo protestë vjen vetëm pak orë pasi Top Channel, në serinë e sulmeve ndaj gjyqtarit Selimi, përmendi faktin, e njohur botërisht prej thuajse 10 vitesh, që ai ka qenë pjesë e trupës gjykuese të “Gërdecit”. Por, me forcën e tij të imponimit, televizioni kryesor në vend duket se i ka rikujtuar “shoqërisë civile”, përfshirë edhe nipit të pronares, se pikërisht Selimi ka qenë relator në atë çështje gjyqësore.
Tashmë është fare e qartë se pronarja e Top Channel e ka vënë në kryq gjyqtarin Shkëlzen Selimi vetëm për faktin se ai nuk ka pranuar t’i bindet “urdhërave” të saj gjatë shqyrtimit të padisë civile, ku ajo është palë kundërshtare përballë bashkëaksionerëve të tjerë të televizionit, Aurel Baçi dhe Albert Sino.
Në javën e fundit, Top Channel ka bërë rreth 10 kronika në edicionet kryesore, në të cilat sulmohet, linçohet, akuzohet dhe abuzohet me emrin e gjyqtarit Selimi dhe familjarëve të tij. Nëpërmjet drejtorit të televizionit, Ben Blushi, e veja Dritan Hoxhës, e themeluesit të Top Channel, ka vendosur të shndërrojë liçensën e marrë për interes publik, në një mjet për të realizuar përfitime thellësisht personale.
“Boldnews.al” ka raportuar edhe më parë për këto sulme të paprecedenta dhe të paprincipta të Vjollca-Blushit ndaj Gjykatës së Lartë dhe, më konkretisht ndaj gjyqtarëve që kanë në shqyrtim dosjen “Top Channel”.
Pak javë më parë, siç u raportua gjerësisht në media, drejtori i TCH, Ben Blushi, u takua me anëtarin e Gjykatës së Lartë, Ardian Dvorani. Ky takim rastiti vetëm pak orë para se trupa gjykuese do të shqyrtonte në Dhomën e Këshillimit padinë për televizionin. Gjyqtari Dvorani, i cili nuk ishte pjesë e trupës gjykuese, imponoi praninë e tij gjatë shqyrtimit të kësaj çështjeje, për shkak të dorëheqjes së papritur dhe të dyshimtë të një gjyqtari të shortuar për të gjykuar këtë rast.
Madje, Dvorani ka tentuar të imponojë qëndrimin e tij ndaj kolegëve të tjerë, që këta të fundit të merrnin një vendim sa më të shpejtë për padinë mbi pronësinë e Top Channel. Por, ky imponim i Dvoranit nuk është pranuar nga gjyqtari Shkëlzen Selimi, i cili ka kërkuar kohë për t’u njohur me aktet e dosjes.
Dhe, pikërisht në këtë moment, Top Channel nis serinë e sulmeve ndaj gjyqtarit Selimi. Nga sjellja e Vjollca-Blushit, krijohet dyshimi se ata prisnin një vendim të shpejtë dhe në favor të tyre nga Gjykata e Lartë. Por, rezistenca e gjyqtarit Selimi duket se u ka prishur planet dhe ndaj kanë vendosur të zhvillojnë “Vetingun” e tyre mediatik ndaj tij.
Por jo vetëm kaq, por, nëpërmjet një skenari aspak dinjitoz, të mërkurën mblodhën edhe “shoqërinë civile” për të protestuar kundër gjyqtarit Shkëlzen Selimi, në formën e një gjyqi publik.