Integrimi/Kërcënimet e Ramës, “pickime mushkonjash” për Brukselin

Nga Boldnews.al

Shqipëria dhe Maqedonia po presin me interes të veçantë takimin Merkel-Makron, parashikuar për të martën, ku dy liderët kryesorë të Bashkimit Europian do të diskutojnë për çështje të rëndësishme të Unionit.

Ende nuk dihet nëse hapja e negociatave për anëtarimin e Shqipërisë dhe Maqedonisë do të jetë temë kryesore ndërmjet kancelares gjermane dhe presidentit francez. Gjithësesi, në Tiranë dhe Shkup presin me shpresë se nga ky takim do të dalë “tym i bardhë” edhe për to.

“Politico.eu”, në një analizë të bërë së fundmi, sheh dy kampe në Bashkimin Europian, të cilat kanë qëndrime të kundërta sa i përket procesit të zgjerimit të shpejtë. Grupi i parë, i përfaqësuar kryesisht nga Franca e Hollanda, është kundër përshpejtimit të procesit me Shqipërinë e Maqedoninë. Në Paris dhe Amsterdam mendojnë se dy vendet ballkanike ende janë larg pritshmërive të Bashkimit Europian.

Franca dhe Hollanda druajnë se hapja e negociatave për këto dy vende mund të nxisë “eksportimin” e krimit të organizuar, i cili edhe aktualisht është një shqetësim i madh për shumë vende të BE-së.

Grupi tjetër, i përbërë kryesisht nga vende të Lindjes, janë pro-hapjes së negociatave me Shqipërinë dhe Maqedoninë. Në vlerësimin e këtij blloku shtetesh, BE-ja, në këtë mënyrë, do të mund të frenonte ekspansionin rus ose kinez, i cili mund të zërë hapësirën e lënë bosh nga Brukseli në vendet e Ballkanit Perëndimor.

Qartësisht, terreni në të cilën po diskutohet e ardhmja europiane e Shqipërisë dhe e Maqedonisë lidhet ngushtësisht me interesat gjeostrategjike të Unionit. Në argumentat e dy blloqeve të krijuara së fundmi në Bashkimin Europian nuk janë në diskutim aspak masat e ndërmarra nga Tirana dhe Shkupi për integrim.

Komisioni Europian kërkonte nga Shqipëria miratimin dhe zbatimin e Reformës në Drejtësi, të cilën vendi ynë, pavarësisht se gjysmake, e ka realizuar. Maqedonisë, Komisioni Europian i kërkoi të zgjidhte me Greqinë çështjen e emrit të shtetit, konflikt i cili tashmë duket i zgjidhur.

E, pasi Shqipëria e Maqedonia kaluan këto sprova, rezulton se ato kanë qenë thjesht një gur në ngrehinën e lartë që duhet të ndërtojnë këto dy shtete në rrugën e tyre drejt Bashkimit Europian. Por, jo vendimtari.

Këto masa të ndërmarra nga Shqipëria e Maqedonia nuk përbëjnë aspak objekt diskutimi ndërmjet dy blloqeve të shteteve brenda Unionit. Të dyja palët janë të shqetësuara për krimin e organizuar ballkanas që është përhapur në shumë vende të Europës; për luftën e munguar kundër korrupsionit lokal; si edhe për mundësinë që ato të bien nën ndikimin ruso-kinez.

Pra, mburrja tipike ballkanase e qeverive të Shqipërisë dhe Maqedonisë se kanë arritur standartet e kërkuara nga Komisioni Europian është vetëm një propagandë, e cila nuk përputhet me realitetin në Bruksel. Franca e Hollanda nuk i duan këto vende së shpejti në BE, për shkak të krimit të organizuar. Vendet e tjera duan hapjen e negociatave me Shqipërinë e Maqedoninë, pikërisht që Brukseli të ketë mundësi të kontrollojë më shumë demokracinë dhe luftën e këtyre vendeve kundër krimit të organizuar.

Të dy grupimet bashkohen në një pikë- janë të shqetësuar nga paaftësia e Tiranës dhe e Shkupit për të forcuar demokracinë dhe shtetit ligjor. Por, zgjidhjen e shohin në mënyrë të ndryshme. Franca e Hollanda kërkojnë më shumë prova se Tirana dhe Shkupi kanë vullnetin për të luftuar krimin e organizuar e më pas të trokasin në dyert e Brukselit.

Ndërsa vendet e tjera shpresojnë se, duke u dhënë dorën Bashkimit Europian, Shqipëria e Maqedonia do të konsolidojnë pozitat e tyre në luftën kundër korrupsionit dhe krimit të organizuar.

Në të dy rastet, Shqipëria e Maqedonia janë shumë larg standarteve të Bashkimit Europian. Nëse në samitimin e fund-qershorit, Tirana dhe Shkupi do të nisin negociatat pa kushte për anëtarësim në BE, atëherë do të kuptohet qartësisht se ka dalë i fituar grupi i shteteve që i frikësohen penetrimit rus në Ballkan.

Në rast të kundërt, edhe kërcënimet e Edi Ramës se, nëse BE nuk tregohet e hapur me Shqipërinë, boshllëkun e saj mund ta zërë ndonjë fuqi tjetër, do të konsiderohen si pickime bezdisëse mushkonjash dhe asgjë më shumë, për burokracinë europiane.

Leave a Reply

Your email address will not be published. Required fields are marked *