Nga Boldnews.al
Pak ditë më parë, Boldnews.al denoncoi një sërë skandalesh në sistemin e burgjeve nga emërimet partiake të Lëvizjes Socialiste për Integrim deri te korrupsioni me tenderat e ushqimit. Por skandali thellohet edhe më tej, pasi një person i dënuar në të kaluarën, ushtron një aktivitet biznesi në burgun e Fierit, me leje të drejtuesve të këtij institucioni por edhe me urdhër të drejtorti të Përgjithshëm të Burgjeve, Miklovan Kopani.
Bëhet fjalë për shtetasin Ladimir Bakiasi, i cili është është shpallur në kërkim nga policia në 18.09.2013 për veprën penale “Plagosje e rëndë me dashje”, pasi gjatë një zënke për motive të dobeta në qendër të fshatit Dushkë ka goditur me levë hekuri shtetasin R.D, 37 vjeç, banues në fshatin Dushkë-Lushnjë.
Edhe pse me një të shkuar problematike me ligjin, shtetasi Bakiasi ka ngritur i pashqetësuar një biznes për shitje e blerje mallrash brenda IEPV të Fierit, duke krijuar kështu një rast sa komik aq edhe turpi për institucionet tona. Sipas policisë, ai është shpallur dy herë në kërkim për vepra të ndryshme penale, ndërsa më herët ka qenë i dënuar.
E sikur mos të mjaftonte kjo, abuzimi duket se shkon deri në nivele të larta. Kjo pasi Drejtori i Përgjithshëm i Burgjeve i cili vjen nga radhët e LSI, nuk ka marrë në konsideratë shqetësimin e Policisë së Shtetit. Kjo e fundit, nëpërmjet shkresave të herëpashershme ka deklaruar se Ladimir Bakiasi nuk ka asnjë element sigurie e besueshmërie jo për të bërë tregti brenda burgut, por edhe për të hyrë në të.
Dokumenti i policisë me nr prot 7767/1 i datës 12/10/2015 e thotë qartë se ky person nuk mund të punojë me dhe për burgjet për shkak të precedentëve. Në një shkresë të dytë, që mbanë datë e shkurtit 2016, Policia e Shtetit u tregon autoriteteteve të burgjeve se shtetasi Bakiasi, “nuk i plotëson kriteret për tu pajisur me dokument besueshmërie e përshtatshmërie” kjo pasi shtetasi në fjalë është shpallur në kërkim me kartelë jeshile në 27/12/2008 dhe në datën 16/06/2013 është shpallur në kërkim me kartelë rozë.
Burime thonë për Boldnews.al se situata e sigurisë në burgun e Fierit është pothuajse jashtë kontrollit. Madje në këtë skandal përflitet edhe emri i Drejtorit të Përgjithshëm të Burgjeve. “Kamionet e furnizimit të biznesit të Bakiasit, mund të hyjnë deri në regjimin e brendshëm të burgut, pa kontroll në skaner por me urdhër të Drejtorit të Përgjithshëm të Burgjeve”- thekson burimi.
Boldnews.al mëson gjithashtu se shtetasi Ladimir Bakiasi kishte regjistruar në shkurt të 2015, në Qendrën Kombëtare të Biznesit (QKB), aktivitetin e tij për shit-blerje mallrash brenda burgut të Fierit. Por këtë aktivitet, Bakiasi ka vendosur ta pezullojë rreth 9 muaj më vonë.
Pavarësisht kësaj, transporti i mallrave me kamion brenda burgut të Fierit vijon ende dhe tregtia me mallrat nuk është pezulluar asnjëherë. Përveç sagës së krijuar në një nga institucionet e sigurisë si ai i IEPV Fier, ende nuk dihet se me çfarë NIPTI po ushtron aktivitetin ish i dënuari Ladimir Bakiasi.
Boldneës.al do të raportojë në vijim të tjera shkelje të rënda në burgjet shqiptare, që nga abuzimet me lejet e veçanta e deri tek korrupsioni në nivelet më të larta drejtuese. Po ashtu do të denoncojë me dokumente urdhrat e Drejtorit të Përgjithshëm të Burgjeve për lejmin e një personi me të shkuar problematike me ligjin për të hyrë në regjimin e brendshëm të burgut të Fierit, i cili konsiderohet institucion i sigurisë së lartë.