SHBA, të shtëna në një qendër tregtare, gjashtë të plagosur

Gjashtë persona janë plagosur në gjendje të rëndë, ndërsa një agresor është qëlluar nga policia, pas ngjarjes së radhës me të shtëna armësh në një qendër tregtare të hapur në jugperëndim të Houstonit, në SHBA.

Ende nuk dihen motivet e kësaj ngjarjeje të dhunshme të ndodhur në supermarketin “Randalls” të qendrës tregtare “Weslayan” në Bissonnet.

Menjëherë pasi policia konfirmoi të shtënat, urdhëroi krijimin e një strehe të sigurt për të pranishmit, ndërsa tashmë është konfirmuar edhe plagosja e agresorit nga një prej oficerëve në detyrë.

Mbi gjendjen e tij ende nuk bëhet e ditur gjë. Trafiku për në “Weslayan” është bllokuar, pasi oficerë të shumtë kanë nisur hetimet në vendngjarje. Ndërkohë, një qendër e improvizuar për dhënien e ndihmës së shpejtë është ngritur në të.

Veç oficerëve të rendit, në vendngjarje është thirrur edhe një skuadër e çmontimit të bombave, pasi një automjet i dyshimtë është pikasur atje. Agresori, i cili ka nisur të veprojë rreth orës 6:30 të mëngjesit, përshkruhet të jetë një person me ngjyrë dhe me një pistoletë në dorë.

“Morëm telefonatën në orën 6:29 dhe na u tha se kishte të shtëna në dyqanin ‘Petco’, e menjëherë në vendngjarje u nisën ekipet e para të oficerëve, ndërsa të shtënat vijuan edhe në parking”.

“Aktualisht kemi rreth 20 automjete të ndihmës së shpejtë. Nuk e dimë sesa të plagosur apo viktima kemi për momentin, por të gjithë ata janë transportuar menjëherë për në spitalet lokale. Sigurisht nga informacionet e para na është thënë se pritet të kemi viktima”, shkroi në “Twitter” policia e Houstonit.

Në vendngjarje shkuan edhe një sërë automjetesh emergjencash. Oficerët thuhet se janë fokusuar kryesisht në asgjësimin e agresorit, i cili ishte fshehur pas disa pemëve dhe vijonte të hapte zjarr ndaj automjeteve përreth.

Leave a Reply

Your email address will not be published. Required fields are marked *