Më shumë se 3 orë bisedime nuk mjaftuan për të gjetur një konsesus mes njëri – tjetrin. Kryeministri Edi Rama dhe Kryetari i Partisë Demokratike dolën të pakënaqur nga takimi i cili tërhoqi pothuajse të gjithë vemendjen mediatike në vend.
Ky dështim duket se ishte parashikuar që në nisje. Rama dhe Basha nuk u përshëndetën me njëri-tjetrin gjatë momentit të uljes në tavolinë. Madje ishin aq të tendosur saqë Rama shkëmbente ndonjë batutë me Petrit Vasilin dhe Fatmir Xhafaj, ndërsa Basha me Edi Palokën dhe Oerd Bylykbashin.
“Më vjen sinqerisht keq që nuk arritëm të bindim PD për të votuar sëbashku draftin e shkruar bashkarisht me partnerët tanë strategjik të reformës në drejtësi, por më vjen mirë tu them gjithë shqiptarëve që i bëra të gjitha përpjekjet e mundshme”- ishte kjo kryefjala e kryeministrit Rama i cili doli i pari pas takimit të dështuar.
Kryeministri tha se në tryezë është shkuar me një plan të ofruar nga ekspertët e huaj për të lehtësuar dialogun dhe afrimin e qëndrimit mes palëve.
“Ne e kishim pranuar 100 përqind këtë plan, ku përfshihej edhe shumica e cilësuar e 2/3 që është kërkuar pa pushim nga Partinë Demokratike pas leximit të parë të raportit të Venecias”- tha ai.
Kreu i Qeverisë thotë se me këtë takim u jepet fund justifikimeve të opozitës për të mos e votuar reformën.
“PD nuk ka lënë gur pa luajtur, marifet pa përdorur, justifikim pa nxjerrë për ta zvarritur këtë reformë dhe për të ndryshuar thelbin e saj. Por sonte dhe mbrapa, PD nuk mund ti tregojë dot as shqiptarëve, as Brukselit, as Uashingtonit, as edhe një arsye të vetme që mund të justifikojë mosvotimin e reformës në drejtësi.”- u shpreh Rama.
Në deklaratën për mediat, kryeministri Rama lajmëroi se drafti i reformës në drejtësi do të niset menjëherë drejt Kuvendit.
“Ne nuk do ta presim më PD. Do të vazhdojmë në rrugën e vetme që kemi, por deri ditën e votës në Parlament, ka plot orë dhe jo pak ditë që demokratët të mos e humbasin bashkë me këtë tren. Pas këtij takimi, reforma do të shkojë drejt e në sallën e Parlamentit”- shtoi më tej ai.
Megjithatë, Rama la hapur një derë për kompromis të orëve të fundit, duke shprehur gatishmëri për të dëgjuar çdo propozim të opozitës që “nuk cenon thelbin e reformës dhe nuk përbën përpjekje për të mbajtur duart e politikës brenda sistemit të drejtësisë”.
Basha konfuz nga takimi, fjalimi i ndërpritet nga thirrja për Iftarin
Ndryshe nga Rama, kryetari i opozitës, Lulzim Basha tha se kishte ardhur në këtë takim me vullnetin për të kërkuar dhe ofruar zgjidhje për një drejtësi të pakapur nga politika.
Fjalimi i Bashës u ndërpre në të gjitha televizionet informative që në fillim nga një spot i Komunitetit Mysliman për thirrjen e Iftarit.
“Me sigurisë, kryeministri ka shprehur para jush se është Partia Demokratike ajo që pengon reformën në drejtësi. Sot ne prezantuam pozicionin tonë për vendet e rezervuara. Kryeministri dhe bashkëpunëtorët e tij nuk patën asnjë element thelbësor kundër këtij propozimi që është ndërkombëtar dhe që funksionon në Kroaci dhe në Maltë dhe është sanksionuar nga Komisioni i Venecias. Nuk ju pëlqen!” – u shpreh Basha.
Koncepti i vendeve të rezervuara u prezantua fillimisht si një nga opsionet e Komisionit të Venecias, në kushtet kur mes mazhorancës dhe opozitës nuk do të kishte dakordësi për shumicën e cilësuar. Ky opsion parashikon që anëtarët jo-gjyqtarë të KLGJ dhe KLP të ndahen mes mazhorancës dhe opozitës.
Basha iu përgjigj edhe kryeministrit Rama për iniciativën e tij për të dërguar draftin e reformës në drejtësi në parlament.
“Çdo akt unilateral i dërgimit në Parlament të një pakete të pa rakorduar me opozitën, do të takohet me dështimin e sigurt. Çdo dështim me votimin në Parlament i kësaj pakete do të thotë shtyrje të reformës në drejtësi.”
Në fjalimin e tij, kryedemokrati Lulzim Basha nuk e përmendin faktorin LSI, si pjesë e dështimit të takimit për reformën në drejtësi.
Rama me fjalim të parapërgatitur për dështimin e takimit
Kryeministri Rama ishte i pari që doli në një prononcim për mediat për të shprehur pikat ku kishin ngecur në takimin me Lulzim Bashën.
“Ne ishim mikëpritësit por ishte dëshira e miqve të dilja përpara që nuk është shumë e natyrshme që mikpritësi të lërë mikun brenda.”- u shpreh Rama.
Por ajo që u vu re nga mediat, ishte fjalimi i parapërgatitur i kryeministrit Edi Rama, një shenjë kjo që tregon mungesë besimi në dialogun me Bashën. Kryeministri lexoi çdo qëndrim të tij në letrën e vendosur mbi dosjen e kuqe.