Mbahet në Tiranë Asambleja Parlamentare e NATO-s

Sesioni i pranverës i Asamblesë Parlamentare të NATO-s, i organizuar nën kujdesin e Kuvendit të Shqipërisë, nis sot punimet në Tiranë, në ambjentet e rikonstrukturara të Pallatit të Kongreseve. Ky takim, që mbahet për herë të parë në Shqipëri, bën bashkë rreth 260 parlamentarë nga 28 vendet anëtare të NATO-s, nga Amerika e Veriut dhe Evropa, si dhe delegatë nga vendet partnere dhe vëzhgues, që do të diskutojnë çështjet e sigurisë ndërkombëtare aktuale.

Dita e shtunë dhe e dielë, 28-29 maj, do t’i kushtohet mbledhjeve të pesë Komiteteve të Asamblesë: Politike, të Mbrojtjes dhe Sigurisë, Shkencës dhe Teknologjisë, Dimensionit Civil të Sigurisë dhe Ekonomisë. Secili Komision do të adresohet nga njerëz të qeverisë, akademisë, OJQ-së dhe NATO-s. Ndërsa diten e hënë, 30 maj, do të zhvillohet séanca plenare e Asamblesë.

Sesioni i Pranverës i Asamblesë së Aleancës do të rishikojë mënyrën se si NATO i përgjigjet nivelit të sfidave me të cilat përballen aleatet dhe prej nga burojnë ato, veç të tjerash, çështja e Rusisë, terrorizmi, konflikti i vazhdueshëm në Irak dhe Siri, migrimi masiv dhe përhapja e raketave dhe armëve të shkatërrimit në masë.

Pjesë të axhendës së takimit në Tiranë, ligjvënësit do të kenë dhe çështjet e sigurisë në Ballkanin Perëndimor, si dhe do të urojnë ftesën e drejtuar Malit të Zi për t’u bërë anëtari i 29 i NATO-s. Kryeministri i Shqipërisë, Edi Rama dhe homologu i tij i Malit të Zi, Milo Djukanovic, do të mbajnë fjalën e tyre vetëm pak ditë pasi ministrat e Jashtëm të Aleancës të nënshkruajnë protokollin e pranimit me Malin e Zi gjatë takimit të tyre në Bruksel.

Ligjvënësit gjithashtu do të rishikojnë arritjet e Misionit Mbështetës të NATO-s në Afganistan, për të cilin Ministrat e Jashtëm vendosëm ta zgjasin atë edhe gjatë vitit 2016, si dhe të ndajnë mendimet e tyre rreth sfidave me të cilat po përballet Ukraina.

Leave a Reply

Your email address will not be published. Required fields are marked *